HARI EMPAT, 8 FEBRUARI 2024

BETING MARO: Pelin Pemansang ti dilanggur ulih ngubah rampa menua Pusa setipak enggau juluk Perintah Sarawak.

Kaban Kunsil Nengeri (ADUN) Beting Maro Razaili Gapor madah, pelin pemansang tu mungkur beberapa iti projek pemansang ti deka ngubah menua Pusa.

“Ditu aku deka madahka siti pelin pemansang ke deka digaga di Pusa iya nya ngaga Palan Lumba Pusa, Kompleks Lumba Pusa enggau balai mayuh guna deka didirika.

“Nya alai, menua Pusa tu ila deka berubah udah projek pemansang nya tembu ila,” iya madah munyi nya maya Program Nyuaka Angpau Enggau Buah Limau ngagai 40 raban China ba Palan Servis P.201 Batang Lupar, kena Hari Tiga.

Pia mega, iya ngarapka pelin pemansang nya ila ulih mai berita ke manah ngagai semua rayat di Pusa.

Dulu ari nya, Kaban Parlimen Batang Lupar Mohamad Shafizan Kepli madahka raban bansa China di Pusa ukai bansa bukai laban sida nya ari kelia diau begulai sama nguan menua.

“Aku ngarapka semua rayat ba sitak Pusa ulih nyaga kaul enggau pangan diri sereta semampai beserakup,” ku iya madah.

Ba program nya, bisi 40 ruang bilik bansa China udah nerima pemeri angpau enggau buah limau mandarin ari Palan Servis N.29 Beting Maro enggau Palan Servis P.201 Batang Lupar. -EDISI UKAS