HARI EMPAT, 21 OKTOBER 2021

PUSA: Perintah Sarawak semampai deka nyaup sida ke deka ngemansangka diri ba industri betanam betupi di Beting Maro.

Kaban Kunsil Nengeri (ADUN) Beting Maro, Razaili Gapor madah, beberapa bengkah endur ba menua nya udah ditentuka nyadi endur ke tau dikemansang enggau pengawa betanam betupi lalu iya andal pekara nya deka mai pemaik ngagai rayat dia.

Ambika banding ku iya baka di Kampung Spinang, Semarang enggau Batang Maro engkeman digagaka endur ngaduka produk ari buah nyiur muda.

Ketegal nya iya madah, iya udah nyediaka perengka guna baka palan ngadu tauka palan ekonomi ba endur nya dikena nyaup rayat dia ngemansangka produk betanam betupi.

Iya madah munyi nya maya program berandau begulai enggau Opis Betanam Betupi Sitak Betong enggau bala tuai raban bansa enggau genturung pendiau (KMKK) di Pusa, kena Hari Tiga.

Razaili mega madah, Kampung Beladin bela tau diangkatka nyadi menua ti ngeluarka produk ari nanas enggau asil berikan lalu Kampung Tambak, Pusa bela udah tebilang enggau produk baka gula apong, chuka apong enggau garam apong.

Sehari nya, iya bela bisi ngabas projek ngemanahka Masjid Al Amin Beladin, Pusa ke digaga enggau ungkus RM2 juta ti dipelabaka tembu pun Disember tu. -EDISI UKAS